In de war of in de knoop, dat kinnen je vast beter lezen en verstoan
Mor als joe de boudel in toeze hebben, is´t stoer om wieder te goan.
En dan bedoel ik nait; koabels, snoeren, slangen of goaren
En hailemoal gain lange hoaren.
Nee, het zit joe in de kop wat tegen, het lopt nait zo recht
Je binnen met joe zulf in gevecht.
Misschien deur ainzoamheid, piene, angst of verdrait
Of dat je last hebben van de rugge en kinnen joe hoast nait bukken
Doagen dat niks wil lukken.
Mor, als joe de boudel in de kop in toeze hebben, zeg mor roare gedachten
Dan binnen de doagen nachten.
En de nachten doagen
En lig je wakker met allerlei vroagen.
Misschien hebben je hulp neudig? het gait allain nait
Je kommen zulf nait uut het verdrait.
Mor kroep nooit weg, blief in´t zicht
Goa d´r op uut, geniet van´t licht.
Geniet van´t veurjoar, als je in de gelegenheid binnen
Misschien is´t in´t begun even wennen.
Geniet van de natuur en oans mooie uutzicht
Het is nog nooit zo donker west, of het wordt oaltied wel weer licht!
Zodat de boudel nait meer in toeze zit in´t leven
Mor soms…………mout´n aander joe ain klain duwtje geven.
Jan H.Ottens