Op ’n mooie oavend joar’n leed’n zatten in ’t noajoar Roef Blokstra, Jans Hooman en Ab Diekstra op ’t Zuderdeip veur café Pras in Valthermond aan de kaande van de wieke. Flip de Groot ston mit de fietse aan de haand bie heur te proaten. ’t Begon al wat te schemer’n en dan is ’t 20 minuut’n loater ook duuster. Oaf en tou pakte Roef zien mondorgel en speuld ein riedeltje en dan zongen of neurieden de aander’n dat zachies mit. Mor nou ging heur aandacht nor Ankie Bosma ein wichie van ein joar of 13-14, dei konnen ze van school.
Ze was ein joar of wat jonger dan heur, ze har ein flinke gang op de kette. De jonges begonnen te zingen: ‘Ik zel die vanoavend wel kriegen. ’t Is nou nog nait duuster genog, enz.” Flip de Groot ging nor huus en stapte op fietse. Ankie kreeg dat in de goaten en ging d’r toen nog veul haarder van deur. Uutgeput kwam ze bie de krudenier in ’t verveners winkeltje aan , ze mos van heur moeke de strooppot vullen lotten. Ze was inmiddels doodsbenauwd, deur de beide eerste regels dei de jonges zongen: “Ik zel die vanoavend wel krieg’n . ’t Is nou nog nait duuster genog” bleef’n heur deur de kop spook’n. Ze dus nait weer nor huus.
De winkelier wui d’r verleeg’n mit en ruip zien vrouw d’r bie en dei kreeg uuteindeliek mit uil veul muite Ankie aan de proat, ze mos de woorden d’r uuttrekken. Ankie zee “dei jonges dei willen mie griep’n en dan trekken ze mie van de fietse oaf in de onderwale en dan pakken ze mie eine veur eine, en ik kin d’r niks teeg’n begunnen want de aander’n hollen mie dan vast.” De winkelier et heur nor huus brocht en doar vertelt woarom Ankie zo bange was. Bosma, Ankie heur pabe ontplofte bienoa, zo kwoad was hij en hij ging drekt op hoge poten nor Blokstra dei ’t dichtste bie woonde en ruip dei in boeten en vertelde wat zien oltste zeun van plan was. Blokstra har de pest toch al in omdat hij bie ’t eet’n wegroupen was, hij gait in huus gript Roef bij de kop en sleept hom aan zien oor’n in ’t schuutje en dut de deure op slot (Roef jankte, hij har egt gein idee woarom hij straft wui).
Blokstra en Bosma binnen toen mit heur beide nor de olders van de aandere jonges goan om ze te vertellen over de zunden van heur kinder. De jongens kreeg’n allemoal ein flinke oaframmeling. Flip de Groot nog het slimst omdat hij Ankie Bosma zulfs al achternoa zeet’n har. De jonges begreep’n werkeliek gein van allen woarom heur olders zo kwoad op heur warren. Dat wui ze d’r nait bie vertelt. Over dat soort dingen pruiten de olders toen ter tied nooit mit heur kinder. Dat mossen ze zulf mor ontdekken, meinstied lukte dat ook wel.
En zo kwam het dat dizze jonges de dupe wui-en omdat Ankie Bosma heur hormoon’n veur ’t eerst in waarking kwammen en hierdeur kreeg ze ongewenste en gewenste dreumen , inderdoad, ’t was om bange veur te worren. Het zel joen kind mor wees’n.
Henny Dubbelboer